قىزىق نوقتا خەۋەرلىرى

ياخشى كېلىن بولۇش ئۇنچە تەس ئەمەس

2017-10-05 19:28:25     مەنبەسى: شىنجاڭ خەلق رادىيو ئىستانسىسى   

مارجانگۈل رېشىت


مەن ئىلگىرى خىزمەتداشلىرىمىزنىڭ، ئۆزەمدىن چوڭ ئۇرۇق- تۇققان، دوست- بۇرادەرلەردىن قېيىنئانا- كېلىن ئوتتۇرىسىدىكى مۇناسىۋەتنىڭ تولىمۇ ئىنچىكە، نازۇك بولىدىغانلىقىنى، ئەگەر سەللا دىققەت قىلمىسا ئۆزىگە ئازاپ تېپىۋالىدىغانلىقىنى  ئاڭلىغانىدىم. 1996- يىلى توي قىلىپ ئاتا- ئانامنىڭ ئەركە قىزىدىن  باشقا بىر ئائىلىنىڭ كېلىنى يەنى كىشىلەرنىڭ نەزىرىدە مۇرەككەپ دەپ قارىلىدىغان تۇرمۇش چەمبىرىكىگە قەدەم قويدۇم. سۇغا كىرمىگىچە سۇنىڭ چوڭقۇرلىقىنى بىلگىلى بولمىغاندەك،  تۇرمۇشقا قەدەم قويغاندىن كېيىن ئاندىن بۇ مۇناسىۋەتنى چۈشەنگىلى بولىدىكەن. مەن توي قىلىپ بىر ھەپتە ئۆتكەندىن كېيىن، تۇغۇلغان كۈنۈم بولدى. بۇ يېڭى ئائىلىدىكىلەر دوستلۇرۇمنى چاقىرىپ ماڭا كۆڭۈللۈك تۇغۇلغان كۈن سورۇنى ھازىرلاپ بەردى. شۇ يىللاردا يېزىلاردا تۇغۇلغان كۈن ئۆتكۈزۈش ئانچە ئومۇملاشمىغان بولسىمۇ، شۇ كۈندىكى قېيىنئانا- قېيىنئاتامنىڭ ماڭا تۇتقان پوزىتسىيەسى ۋە ھۆرمىتى تا ھازىرغىچە ئېسىمدىن چىقمايدۇ. مېنىڭ تۇرمۇشۇم مانا مۇشۇنداق باشلانغان، ئەمما تۇرمۇش بولغانىكەن، ئانداق- مۇنداق سۈركۈلۈش ۋە زىدىيەتلەردىن خالىي بولغىلى بولمايدىكەن. مەن نىكاھلىق تۇرمۇش جەريانىدا ئائىلىدىكى زىدىيەتلەرنىڭ كېلىپ چىقىشى ئاساسلىقى كېلىن بىلەن ئائىلە ئەزالىرى ئوتتۇرىسىدا بولىدىغانلىقى ھىس قىلىپ بۇلارنى ياخشى بىر تەرەپ قىلىشتا ئاپامنىڭ كېىنلىك بۇرچىنى قانداق ئادا قىلغانلىقىنى ئۆزۈمگە ئەينەك قىلدىم.
مەن كىچىكىمدە دادامنىڭ ئاپىسىنىڭ يېنىدا تۇراتتىم. مومامنىڭ ھەمىشە كۆز ئالدىمدىلا ئاپامنى ھاقارەتلىگەنلىكىنى ئاڭلىغاندا بىئاراملىق ھىس قىلساممۇ ئاپامغا ئېيتمايتتىم. مومام ئاپامغا بولغان نارازىلىقىنى دائىم ئىپادىلەپ قوياتتى. ئاپام مومامنىڭ دوق قىلىشلىرىنى، ئورۇنسىز رەنجىشلىرىنى بىلسىمۇ بىلمەسكە سېلىپ، ئاڭلىسىمۇ ئاڭلىماسقا سېلىپ، ئۈن- تۈنسىز كېلىنلىك، يەنى بالىلىق بۇرچىنى ئادا قىلىۋېرەتتى. مومام يېشىنىڭ چوڭىيىشى بىلەن ئۆز ھاجىتىدىن چىقالمايدىغان بولۇپ قالغاندا، ئاپامنىڭ مومامغا قىلغان ئۈن- تۈنسىز خىزمىتى ئاخىرى مومامنى تەسىرلەندۈرۈپ مومامنىڭ كۆزلىرىدىن خىجىللىق، پۇشايمان ياشلىرىنى ئەگىتكەنىدى. مەن بۇنىڭدىن پەقەت ۋاقىت، سەۋرىچانلىق ئۆزئارا چۈشىنىشنى چوڭقۇرلاشتۇرىدىغانلىقىنى چوڭقۇر ھىس قىلىپ،ئۆزەمنىڭ كېلىنلىك  مەجبۇرىيىتمىنى  ياخشى ئادا قىلىش ئىرادەم تېخىمۇ كۈچەيدى.
ھازىر ئائىلىمىزدە ئۈچ ئەۋلاد بىرگە تۇرمۇش كەچۈرىۋاتقان بولساقمۇ، ھەممىمىز ئىزچىل ئىناق، ئۆزئارا كۈيىنىش، ئىناقلىقتا باشقىلار ئېتىراپ قىلىدىغان، ئۆينىڭ ھەممە يېرىدىن خوشاللىق ۋە بەخت شاتلىقى  جۇلالىلىنىپ تۇرىدىغان ئائىلە مۇھىتى يارىتىلدى.  ئىللىق ئائىلە بەرپا قىلىشتا ياخشى ئاتا، ياخشى ئانا بولۇش بىلەن بىرگە،  ياخشى پەرزەنت، ياخشى كېلىن بولۇشمۇ ئىنتايىن مۇھىم ئىكەن. قېيىنئانام، قېيىنئاتامنىڭ مېنى يېقىندىن قوللىشى بىلەن  تىرىشىپ ئىشلەپ خىزمەت ئورنۇمدا ئاز بولمىغان نەتىجىلەرنى قولغا كەلتۈردۈم. ئۆي ئىچىدىكى ئىشلاردا قېيىنئانامنىڭ ياردىمىدە ھازىرقىدەك گۈزەل ئائىلە مۇھىتىنى بىرلىكتە ياراتتۇق.
مەن كېلىن بولغاندىن بۇيان، قېيىنئانا- قېيىنئاتامغا ئىزچىل ئۆز ئاتا- ئانامغا مۇئامىلە قىلغاندەك مۇئامىلە قىلىپ كەلدىم، مەن بۇ ئائىلىگە كېلىن بولۇپ كىرگەن كۈندىن باشلاپ تا ھازىرغىچە مەيلى ئۇلار بار يەردە ياكى ئۇلارنىڭ ئارقىدا بولسۇن ئۇلارنى ئىزچىل ئاتا، ئاپا دەپلا ئاتاپ كەلدىم. ئۇلارنىڭ كۈندىلىك يېمەك- ئىچمەك، ئارام ئېلىش ئادەتلىرىگە ئىزچىل ھۆرمەت قىلدىم، ئائىلىدىكى ئوخشاش بولمىغان زىدىيەتلەرنى توغرا بىر تەرەپ قىلىشقا ئەھمىيەت بەردىم. بىر قېتىم قېيىنئانام دوستۇم بىلەن ئۇچرىشىپ ئۇنىڭغا بىر ئىشتا مەندىن سەل نارازى بولۇپ قالغانلىقىنى ئېيتىپتۇ. دوستۇمدىن بۇ گەپنى ئاڭلاپ، تولىمۇ بىئارام بولدۇم ۋە مۇۋاپىق پەيتنى تاللاپ، قېيىنئانام بىلەن سىردىشىپ، ئۇقۇشماسلىقنى تۈگەتتىم.
يولدىشىمنىڭ قېرىنداشلىرىنى ئۆز قېرىندىشىمدەك كۆردۈم. ئۇلارغا نىسبەتەن ھەر ۋاقىت كۆڭلى- كۆكسۈمنى كەڭ تۇتۇپ، ئائىلە ئىشلىرىدا بەس سالماي، ئۆز ئارا يول قويۇش ئاساسىدا ئۇلار بىلەن ئەپ ئۆتتۈم. ئائىلىدىكى ئىشلاردا مەسىلىلەرنى ھەق- ناھەق، توغرا -خاتا دەپ ئىنچىكىلەپ كەتمىدىم. چۈنكى،ئائىلىدە ئۇنداق- مۇنداق ئىشلار بولۇپ تۇرىدۇ، بۇنىڭ توغرا- خاتاسىنى ئايرىيمەن دىسە زىدىيەت تېخىمۇ كەسكىنلىشىپ  كېتىدۇ. شۇڭا كەڭ قورساق، ئەپۇچانلىق بىلەن ئىشلارنى ھەل قىلىشقا تىرىشتىم.
مىننەتدارلىق تۇيغۇسىدا بولۇش  ئىنسان ئۈچۈن ئەڭ زور ئالىجاناپلىقتۇر. بىر يازغۇچى «مەيلى كىم بىلەن زىدىيەتلىشىپ قېلىڭ، سىزنىڭ  پوزىتسىيىڭىز سىزنىڭ مۇناسىۋىتىڭىزنى بەلگىلەپ قويىدۇ. سەمىمىي، كەڭ قورساق  پوزىتسىيە مەڭگۈلۈك تونۇشتۇرۇش خېتى» دېگەن ئىدى. كېلىن بولغۇچى ئۆزىدىكى كېلىنلىك بۇرچىنى ئادا قىلالىسا، شۇ ئائىلىگە نىسبەتەن ئىلمىي قاراشنى تىكلىسە، ئالدىنقىلارنىڭ ئېسىل ئائىلە ئىستىلىنى، ئۆرنەكلىرىنى ئۆز تۇرمنۇشىغا  تەدبىقلىسا، ئورۇنسىز زىدىيەتلەرنىڭ ئالدىنى ئېلىپ، ئائىلە بەختىدىن بەھرىمەن بولغىلى بولىدۇ، دەپ قارايمەن.
ئومۇملاشتۇرغاندا، ئۆزەمنىڭ كېلىنلىك ھاياتىمدا ئائىلىدىن ئىبارەت بۇ مېھىرلىك ماكاننى ماڭا بەخت ئاتا قىلغۇچى مەنىۋىي يۆلەك بولدى، مەن بۇ بەختكە ئېرىشىش ئۈچۈن ئائىلىدىكىلەرگە چامىمنىڭ يېتىشىچە بەخت ئاتا قىلىشىم زۆرۈر دەپ قارىدىم، ئەمەلىي ئىشلىرىمدا ئۆزۈمدىكى ئەقىل-پاراسەتنى بۇ كىچىك ۋەتەننىڭ بەختى ئۈچۈن سەرپ قىلىپ كېلىۋاتقانلىقىمدىن ئۆزۈمنى بەختلىك ھىس قىلىمەن.

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
2018-يىلى 1-ئاي
2018-يىلى 2-ئاي
2017-يىلى 11-ئاي
2017-يىلى 12-ئاي
2018-يىلى 3-ئاي
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى